Sejour de descuberto en Droumo prouvençale - Aubergage et acuei de group.

Ernest Jouhy

Ernest Jouhy

Presentacioun de l’assouciacioun

Lou Fougau internaciounau d’ Estùdi Francés es uno assouciatioun segound la lèi de 1901  foundado pèr Ernest Jouhy en 1961.  Bernard Martini e sa mouié Madaleno, l’un et l’autre proufessour d’alemand n’an tengu  l’empento bountousamen jusqu’en 2002.
Aro, emé Bernat  Faquin pèr presidènt e Alan Gorre per direitour, lou FIEF aculis tout de long de l’an de group e de famiho de touto naciounalita que fan de sejour : semenàri, estage proufessiounau, cous de lengo e civilisacioun, viage d’estùdi e descuberto dou patrimoni, ativeta artistico,fèsto de famiho…

L’istori dou F.I.E.F.

- Perqué avé founda lou FIEF ?
- E perqué à la Begudo-de-Mazen ?
Lou foundadou dou FIEF, Ernest Jouhy (1913-1988) respoundeguè à-n-aquelo questioun vingt an après que se la fuguè pausado à-n-éu-meme.

le fief

«Ai de coumença pèr ma biougrafio, noun pas pèr me metre sus lou pountin mai pèr faire coumprene de  mounte  avié sourgenta l’idèio e la voulounta de mena ma vido.

Moun enfanço se debanè à Berlin dins li annado vint. Li darriés an que passère au licèu fuguèron marca  pèr l’enantimen dou facisme. D’aquéu tèms, jouine afeciouna de Marx e d’Alfred Adler me bastounère dins uno ourganisacioun jusiolo de la gaucho estrèmo contre lou racisme, la patrioussarié, e contro l’ahiranço cinico de l’Umanisme. En 1933, après sèt mes à l’escoundu dins uno  Alemagno qu’avié vira itleriano ai rejougnu à Paris la branco franchimando de ma famiho. Acabère mis estùdi de sico-pedagougio à la Sourbono, mai de 1933 à la fin de la guerro, de tout moun enavans, de touti mis espèr, ai lucha de tout moun esperit, pouliticamen e de la man armado contro lou Cifèr  ensaunousi de la terrour facisto.

Avans d’èstre aclapa, li nazi alemand avien  sagata quàsi  touto ma famiho, assesina mis ami, despatria  lis enfant qu’aviéu en cargo de lis educa, e pamens en 1952 revenguère en Alemagno en acetant  de travaia dins uno chourmo ensignarello  que fuguè alor en tèsto d’uno coumunauta escoulàri  à l’avans-gardo de la reformo demoucratico de la jouino Republico Federalo d’Alemagno. Me ié siéu recampa, iéu, jouine Francés, per ço qu’ère counvincu que deviéu semoundre l’esperiènci de mi soufrènço, mi couneissènço  de la poulitico, ma coumpetènci d’ensignaire à-n-aquelo generacioun en trin, de l’autre man dou Ren, blessado que fuguè e courroumpudo pèr douge annado de barbarié.

Adounc ai replanta caviho en Alemagno pèr co que, à moun vejaire, li Franco-Alemand semana clar qu’èron en meme de faire reviéure dins l’èime di jouinis Alemand l’eiretage umanisto abousouna n’èron respounsable davans l’Europe entiero. Avien de faire reviéure dins aquelo jouino generacioun de « l’ Alemagno annado zèro » lou camina dis idèio de Descartes à Leibnitz e à Kant, de Rousseau à Goethe, de Condorcet à Humboldt. Devien à l’Europo que fuguèsson esvihado dins la jouinesso li gràndi  viste qu’avien ispira de gigant de la pensado, alemando tant qu’éuroupenco, de Hegel à Marx, de Shiller e de Heine à Bert Brecht e à Böll, de Freud et d’Adler à Adorno e à Bloch. Ai pas tengu comte dis eissige de mis ami de la Reseistènci que s’oupausavon à moun retour en Alemagno. Falié encarna dins l’educacioun  e l’ensignamen lou message de 1789 e l’ourrour di camp de l’ouloucauste, l’inne à la joio de Schiller, la musico de Beethoven et rapela la bassesso d’un Goebels e li bramadisso  di seicioun d’assalido.

Bèu talamen que me siéu recampa en Alemagno en voulant adurre la Franço dins mi valiso e, tout en avènt planta caviho à l’Odenwald, es à la Begudo qu’ai crea lou fougau. Lou fougau francés que, d’aquéu tèms, eisistavo que dins mi pantai, devié se capita, à moun estimo, un cèntre « peri-escoulari » d’éducacioun per li jouine e de requalificacioun pèr lis ensignaire . De soun emplantamen e de si metodo devié demoustra lou verai, segound Sartre, que « l’eisistènci precedis l’essènci. » Devié faire touca dou det que lou deveni porto frucho en se controdisènt, moustra li jas subrepausa de l’ Istori, l’armounio e l’oupousicioun de la naturo e de la culturo, emai de l’individu vis-à-vis de la soucieta.  Devié s’emplana dins un terraire ounte l’imènse eiretage de la Franço e de l’Europo se poudié faire sentiis
ensignaire  e i jouinis Alemand sènso  ges de manuau nimai d’ensacage en une rode ounte rèn que lou bonur de i’ èstre se ressènt  proumié avans de senti lou besoun d’aprene, e mounte rèn que de viéure lou moumen prèsent vous baio courage pèr esbaucha l’aveni.

Tre ma proumiero toco emé lou vilage de Casteù fuguère assegura que la Begudo vendrié à biais. Adeja que la Resistènci  m’avié liga emé la regioun dou Rose e dis Aup, fuguè  lis estage de l’UNESCO pèr lis educaire d’enfant vitimo de la guerro que m’an adu à l’escolo de Beauvallon, tant vau dire à Diéu-lou-fet, e si remiràbli direitouro me faguèron descurbi Castèu-Nou-de Mazen.  Quand, en 1948 me capitère pèr lou proumié cop sus aquesto colo de mounte voste uei tèn à la fes  l’espandido e si raro, ounte lou païsage es « defini » coume l’esperit latin ai pantaia de vèire  aquel ancian fièu féudau de mèstre et d’esclau à l’esperit estequi se tremuda en un FIEU liéure de prejujat, sènso-autre mèstre que l’esperit de coumprènenço universalo e de toulerànci ounte l’internatiounale soucialisto se sentiguèsse dins sa patrio et la jouinesso estrangiero dins un fougau tout bèn siéu.

Ai pantaia d’aquelo creacioun, amourous qu’ère de talo qualita de vido, emai en educaire  en bousco de si estrumen de travai.  Li qualita de vido de la Droumo e tout ço que se n’en tiro d’entresigno pedagougi m’an estaca pèr sèmpre à-n-aquelo obro. D’efèt, eici,dins aquesto païsage de lus e de culturo vous sentès liga au passat et au presènt de la Franço e de l’Europo.

Aquéu païs, au cop mieterran e aupen, raste e abelan, galés e rouman, prouvençau e franchimand, catouli e proutestant, disciplina e reguignaire, austère e galoi, encarno  lis antinoumio franceso que fan nèisse l’amour, l’amiracioun, dou meme tèms  que cougreion l’esperit criti e lou voulé dou cambiamen. La vièio glèiso roumano e l’oustau di Templié de Casteunou à miech ouro de camin dou cèntre atoumi, la tourre féudalo e lou dounjoun souvertous de la repressioun assoulutisto à Crèst, tout aco  gaire liuen di marco de la Resistènci dins la court dou FIEF, e di laisso de la Terrour e de la Liberacioun dins lou Vercors, n’i’a proun pèr ancra l’estagiaire dins lou passat e ié douna d’ande pèr countunia e faire de nou. Sian dounc au rode ounte la geougrafio, l’Istori, l’ecounoumio, lou souciau, lou culturau, precedisson e anouncion l’essènci dis idèio e dis oupinioun que s’oupauson e se ié mesclon.

Es un « subre-vivènt » d’uno generacioun fautiblo e abandounado en Franço coume en Alemagno que trouvè d’ami pèr partega sis espèr e prene si part de peneo dins la creatioun dou FIEF. Es desmié éli, li jouine e d’en proumié Bernat et Madaleno Martini, que, après li coumençanco mal-eisado de i’a vint an, countùnion, trasformon, alargon l’obro coumuno en s’ispirant dou dire de Jan Jaurès, aquel apostoli dou soucialisme umanisto e de la Pas : « Es en tirant vers la mar que lou flume rèsto fidèu à  soun sourgènt.»»

Ernest JOUHY, jun 1981

FIEF - Foyer International d’Etudes Françaises - 245, Grande Rue - Châteauneuf de Mazenc - 26160 La Bégude de Mazenc - France
Tél : +33 (0) 4 75 46 21 48 - Email : info@fieflabegude.com - www.fieflabegude.com - Google+ - Facebook

foyer en drome provençale creation de site internet tourisme Provence 2012